多於140個字的碎碎念

************這篇影評可能有雷************

本來想今日去二刷Zootopia，然而前幾日發現黃子華同容祖兒為Zootopia嘅粵語版配音，就抽起咗我想睇粵語電影嘅筋。廣州擺明唔會上粵語版，但抽起嘅筋需要舒緩平伏，又咁啱琴晚睇到呢部戲有票賣，就手痕痕買咗張飛。（哈哈哈「張飛」。。。）

琴晚之前我完全唔知道呢齣戲嘅存在，所以稍微睇咗下佢嘅豆瓣頁。發現有位我單向關注、好可能系電影行業、座標北京嘅豆友嘅短評話香港人處處講九七，佢可能仲因為咁而俾咗一星。人人睇嘢嘅角度都唔一樣，我當然唔會對呢位豆友有意見。不過睇完齣戲之後，我都有自己嘅睇法。依家三四十歲嘅港人講起青春，有咩可能唔提九七？我細個睇過好多香港娛樂類雜誌（繁體字就喺嗰陣時無師自通咖嘞）（戲中出現過嘅嗰本Yes，話唔埋我都有睇過）。每期嘅讀者來信唔喺話「遲啲要移民去加拿大，好唔捨得啲friend」，就喺話「死黨就嚟移民去澳洲，希望佢唔會唔記得我」。我仲記得一個比我大嘅親戚響回歸前幾年就同我講佢唔想做中國人。當時仲喺一舊飯咁嘅我聽完就懵逼嘞，咩話？哦~~ 所以如果講九十年代嘅港式青春，唔提呢一段回憶，先至喺為咗唔講而唔講嘅政治唔正確。

講翻齣戲，劇情線實在不怎麼樣。同老公不和於是想去尋找翻當年另一個青梅竹馬嘅人？如果我喺嗰只竹馬，我先唔想見你啊！不過導演，唔想見都唔洗死卦？！呢個結局我接受唔到囉！！雖然喺咁，睇完後對當中一啲細節位仲喺有啲感慨。千Va早上坐小巴去翻工，芸芸人海中嘅一個，應咗中學時代少女講「大個咗都喺做齒輪」嘅話。追夢嘅少年話香港無夢想可言而選擇出國，前提喺父母俾得起學費。俾唔起嘅，咪留翻係本地打份工囉。朝九晚X，前一晚未煩完嘅事，第二朝無論如何都要先放低，翻工氹掂個客加完班之後再繼續煩啦。但又話翻轉頭，出咗國唔等於一定可以追到夢，分分鐘仲會瓜得，喺咪啊導演？我睇戲嗰時無留意到，但後嚟見到有人話追夢少年嘅墓上日期竟是生於九月十二日，卒於四月一日。如果真喺咁，呢個設定就未免太做作嘞！！！！！

琴晚睇下個演員表，對林海峰做主角感到有啲意外。佢居然同Noel同年，而且仲要大幾個月。真喺唔似喔，林九睇落後生啲。陶傑嘅出現我覺得幾搞笑。短短一兩分鐘，都不忘宣傳一下佢嘅愛（英）國之情哈哈哈。趙學而就真喺好耐無見嘞。表中仲有鍾麗琪個名，而遲到咗十分鐘嘅我響後面嘅劇情裡面根本冇發現佢演邊個。而家嘅香港電影好多都喺陸港合作，少少粵語多多國語咁，好少再睇到幾乎純香港嘅製作。睇呢部戲嘅感覺有啲似某天我坐係修頓球場斜對麵茶餐廳食嘢時聽到成間鋪頭嘅伙記（包括上菜嗰個）都喺講廣東話嘅感覺一樣，竟然有少少感動。呢種情緒完全無關乎排外或者排斥國語，純粹喺出於一種記憶，因為我細個嗰時嘅廣州都喺咁。   舉報