大家一齊就好

得閒冇事到處逛下逛下，諗起好似都好耐冇睇過香港賀歲片，雖然未到過年時候，不過冇乜所謂啦，橫掂咁多年嚟都係一個人睇咖啦。

之前都有睇過《72家租客》同《我愛HK 開心萬歲》，不過後尾啲就冇睇啦，可能對於我嚟講唔係好重要，所以唔會太去記。然之後呢次就一次睇左《2012我愛HK 喜上加囍》、《2013我愛HK恭囍發財》同埋《六福喜事》。不過《喜上加囍》好似唔似賀歲片，唔知2012嘅賀歲片係邊出？不過既然都睇左啦，就湊下數啦。

當然我所講嘅賀歲片係好狹義嘅，即片中結尾要有過年嘅場景或在嗰個時間段，所以呢種戲基本上都係大團結結局。而且戲路都會比較窄，無非都係經歷左一系列嘅波折之後要懂得珍惜，又或者因果報應，最後好人有好報，惡人有惡報。所以有時睇多左，好多人都覺得冇乜意思，覺得好多爛gag，如果係唔明粵語同一啲香港市井文化嘅更加啦。尤其香港喜劇片好多時候都會有一啲情色點，俾人覺得好似好低俗，尤其《六福喜事》，真係連我都覺得不忍目視啊。

不過對於我講，其實都係湊個熱鬧啫，起碼行笑聲中可以暫時忘掉自己嘅寂寞，行嗰片溫情中尋找現實嘅希望。雖然始終都要返翻生活喥，雖然我哋都明白好多大道理。但珍惜呢兩個字又有多少人明呢？

所以睇賀歲片最緊要開開心心，可能係自己笑點低，或者比較健忘，好似曾相識，但唔同嘅演繹都會覺得好笑嘅，當然唔好太爛就得啦。最後最鍾意嘅就係《我愛HK》系列結尾大家一起又唱又跳嘅時候。
只好大家都喺喥就好，2015又會有乜精彩呢？會有人陪我睇賀歲片嗎？   舉報